Benítez skrifar undir nýjan 4 ára samning við Liverpool

Rafael Benítez, knattspyrnustjóri enska knattspyrnuliðsins Liverpool, skrifaði í dag undir nýjan fjögurra ára samning við liðið. Benítez var á óskalista spænska liðsins Real Madrid yfir knattspyrnustjóra en hann ákvað að vera áfram hjá Liverpool.

„Ég er ánægður með að hafa skrifað undir nýjan saming," sagði Benítez, sem þegar hafði fallist munnlega á nýjan þriggja ára samning. „Ég er mjög ánægður hjá Liverpool og vona að við munum ná góðum árangri á næstu leiktíð."

Liverpool varð í þriðja sæti í ensku úrvalsdeildinni í vor, á eftir Chelsea og Manchester United. Liðið tekur þátt í Meistaradeild Evrópu á næstu leiktíð, en liðið vann Meistaradeildina árið 2005 og varð bikarmeistari á Englandi í vor.

 Af vef MBL.